ааааааааМузей-сядзіба Францішка Багушэвіча “Кушляны” ккккккккМузей-сядзіба Міцкевічаў “Завоссе” еееееееееЛітаратурны музей Кузьмы Чорнага нннннннннЛітаратурны музей Максіма Багдановіча гггггггЛітаратурны музей Петруся Броўкі иииииииМузей-дача Васіля Быкава шшшшшшшшБеларуская хатка ккккккХата-музей Петруся Броўкі ппппппппФальварак “Ракуцёўшчына”

Адкрый для сябе скарбы нацыянальнай літаратуры

З 1991 года пачалося аднаўленне сядзібы Лычкоўскіх, стварэнне філіяла, які на сённяшні момант уключае наступныя музейныя аб’екты: Дом арандатара, Дом гаспадара, гумно, Максімаву крыніцу, помнік і Максімаў сад.

IMG_0032

У першую чаргу быў адноўлены Дом арандатара, дзе ўлетку 1911 г. жыў М.Багдановіч. У гэтым доме, дзе, як сцвярджаў сам паэт, вельмі добра пісалася, створана музейная экспазіцыя. Цэнтральнае месца займае фотаздымак дзевятнаццацігадовага Максіма Багдановіча, побач − яго адзіны прыжыццёвы зборнік вершаў “Вянок” (1913 г.), фотаздымкі сяброў Антона і Івана Луцкевічаў, В.Ластоўскага, паштоўкі з выявамі Вільні. Гэтыя экспанаты распавядаюць пра адзін з самых творча насычаных перыядаў жыцця паэта. У інтэр’еры пакоя выкарыстаны прадметы мэблі, побыту пачатку ХХ стагоддзя: драўляны ложак, стол. На ім размешчаны кнігі французскіх аўтараў, якімі захапляўся М.Багдановіч (П.Верлен, Г.Флабэр, Ш.Бадлер). Над сталом лунае птушка з саломкі, як сімвал паэтычнага натхнення.

Кожны з прадметаў паасобку і ўсе яны разам ствараюць уражанне, што малады паэт, які жыве ў гэтым дамку, пакінуў яго хвіліну назад: выйшаў на шпацыр альбо запрошаны да гаспадароў.

У Доме гаспадара ўзноўлены інтэр’еры гасцёўні, кухні, створаны дзіцячы пакой. Самая вялікая частка экспазіцыі размясцілася ў гасцёўні. Рэканструкцыя інтэр’ера гэтага пакоя суправаджалася стварэннем адпаведнай, нават некалькі рамантызаванай атмасферы, на якую звяртала ўвагу ў сваіх успамінах Я.Шабуня. Менавіта тут маладога паэта сустракалі гаспадары з беларускай гасціннасцю і шчырасцю, былі яго суразмоўцамі і дарадцамі.

Для стварэння адпаведнага настрою і адлюстравання тагачаснага жыцця шляхціца выкарыстаны кнігі і газеты, якія падкрэсліваюць адукаванасць гаспадара, яго актыўную жыццёвую пазіцыю, цікаўнасць да гісторыі і літаратуры. Асаблівую ўтульнасць пакою надае вялікі круглы стол, які займае цэнтральнае месца і сервіраваны для гарбаты. Экспануюцца фотаздымкі родных гаспадара, Зоф’і Лычкоўскай, Эміліі Шабуні і яе дачкі Яніны, да якой вельмі цёпла ставіўся М.Багдановіч.

Пяшчотнасць, замілаванне Максіма Багдановіча ў адносінах да дзяцей раскрываецца ў яго шматлікіх вершах. Адметнасцю экспазіцыі ў Доме гаспадара стаў дзіцячы пакой. Лялечная мэбля, буфет і канапка, маленькая дзявочая кашулька з далікатнымі карункамі, палічка з кнігамі. Побач − калыска з лазы, магчыма, у такой калысцы некалі засынала маленькая Яніна пад казкі, якія расказваў ёй Максім.

Кухня у дамах дробнай шляхты выкарыстоўвалася па сваім прамым прызначэнні − для прыгатавання ежы і захоўвання прадуктаў. Яе інтэр’ер адноўлены часткова, экспануюцца тыповая мэбля і прадметы хатняга ўжытку. Вязанкі часныку і цыбулі, сушаных яблыкаў і зёлак ствараюць адчуванне таго, што тут жывуць сапраўдныя гаспадары, гасцінныя і шчодрыя.

Уявіць сабе жыццё беларусаў, “поўнае штодзённага клопату”, можна пры наведванні гумна, якое раней служыла для захавання і сушкі снапоў і іх далейшага абмалоту. У экспазіцыі прадстаўлены прылады працы селяніна − сярпы, цапы, прылады для апрацоўкі ільну і інш. У цэнтры − тагачасныя транспартныя сродкі: сані і воз − узор сталярнай і кавальскай працы. Цікавымі пададуцца наведвальніку вялізныя карабы для захоўвання зерня, пляцёнкі з лазы і саломы, дзежкі.

Музей прапануе Вашай увазе:

- аглядавая экскурсія па экспазіцыі:

кошт квіткоў – 75 кап. (школьнікі), 1 р. 50 кап. (дарослыя);

экскурсія – 3 рублі з групы.

- лекцыі:

“Жыццёвы і творчы шлях Максіма Багдановіча”;

“У зачарованым царстве Максіма Багдановіча”;

“Вянок” Максіма Багдановіча”;

“Старонка лепшая ў штодзённіку жыцця (Вільня і Ракуцёўшчына)”;

“Дзень гімназіста”;

кошт лекцыі з відэапрэзентацыяй – 80 кап. з чалавека, без відэапрэзентацыі –40 кап. з чалавека.

- музейна-педагагічны занятак:

“Сам зраблю батлеечную ляльку” (уводная частка – расповед пра гісторыю батлеечнага тэатра, выраб батлеечнай лялькі з паперы);

Кошт – 1 руб. з чалавека.

 

Адрас: в. Ракуцёўшчына, Маладзечанскі р-н, Мінская вобл.

Праезд: цягніком Мінск – Маладзечна, Маладзечна – Мінск, да станцыі Уша.

Музей працуе з 9.00 да 17.30 (выходныя дні — панядзелак, аўторак і дні дзяржаўных свят).

Кантактныя тэлефоны: 8 -0176-7-96141; 8-029-853-05-74;

Загадчык музея: Сярболіна Настасся Мікалаеўна