Дзяржаўны музей гісторыі беларускай літаратуры

Адкрый для сябе скарбы нацыянальнай літаратуры !

BelarusianEnglishGermanRussian

Дзяржаўны музей гісторыі беларускай літаратуры

Дзяржаўны музей гісторыі беларускай літаратуры

BelarusianEnglishGermanRussian

Запрашаем на выставу мастацкіх работ Генадзя Чыстага “І прад высокаю красою…”

Літаратурны музей Максіма Багдановіча прэзентуе часовую экспазіцыю жаночага партрэта музейнага мастака Генадзя Чыстага, як вясновы падарунак жанчынам.

Генадзь Рыгоравіч Чысты – член Беларускага саюза мастакоў, вядучы мастак Дзяржаўнага музея гісторыі беларускай літаратуры. Ён нарадзіўся ў Мінску 5 красавіка 1947 года, скончыў Мінскае мастацкае вучылішча ў 1968 годзе. Працуе па ўсёй Беларусі і далёка за яе межамі. У музейную сферу Генадзь Рыгоравіч увайшоў у 1980-я як мастак-афарміцель выстаў і экспазіцый, вельмі хутка перайшоў на “новы” ўзровень. У многіх музейных праектах Г.Р.Чысты выступаў як аўтар мастацкай канцэпцыі, стварыў экспазіцыі Музея-сядзібы Францішка Багушэвіча “Кушляны”, Літаратурнага музея Кузьмы Чорнага ў Цімкавічах, Дома-музея Янкі Купалы ў Яхімоўшчыне, Дома-музея Адама Міцкевіча ў Навагрудку, музея-запаведніка Янкі Купалы “Вязынка”.

Шмат зрабіў Генадзь Чысты для ўшанавання памяці Максіма Багдановіча. Генадзь Рыгоравіч – аўтар мастацкай канцэпцыі ў мемарыяльным Доме-музеі Максіма Багдановіча ў Яраслаўлі, экспазіцыі літаратурна-мемарыяльнага музея паэта “Фальварак Ракуцёўшчына”. Ім былі створаны грунтоўныя выставачныя праекты Літаратурнага музея Максіма Багдановіча – “Максімаў сад”, выстава, прымеркаваная да 100-годдзя публікацыі казкі М.Багдановіча “Мушка-зелянушка і камарык – насаты тварык”, “Дзень гімназіста”, “Застаецца Памяць…” (да 110-годдзя з дня нараджэння Н.Б.Ватацы), “Яблычны рай”, “Я – Маці” (да 150-годдзя з дня нараджэння Марыі Апанасаўны Багдановіч).

Генадзь Рыгоравіч – чалавек з вялікім сэрцам і шчырай душой, прафесійны і адметны мастак, акрамя цудоўных экспазіцый, ён напаўняе мастацкія творы цеплынёй і прыгажосцю. Працуе ў розных тэхніках (акварэль, пастэль), у розных жанрах (партрэт, нацюрморт). На часовай экспазіцыі ў асноўным будзе прадстаўлены жаночы партрэт з магнетычнай прывабнасцю жаночай душы. 

У адзінай кнізе Максіма Багдановіча “Вянок” ёсць цыкл вершаў “Мадонны”, прысвечаны жанчыне, жанчыне-маці, жанчыне-мадонне. Генадзь Чысты сваю выставу прысвячае жанчынам, прыгажосці, вясне.

 

Урачыстае адкрыццё выставы адбудзецца

12 сакавіка 2020 года а 18-й гадзіне

Літаратурны музей Максіма Багдановіча

г.Мінск, вул. М.Багдановіча, 7а

тэл.: (017) 334 07 61, (017) 334 42 69

maksimbagdanovich@gmail.com