18 чэрвеня 2022 г. а 17-й гадзіне запрашаем на экскурсію па часовай літаратурна-мастацкай экспазіцыі “Леў Талстой: вобраз, створаны Рэпіным”, якая ладзіцца ў межах сумеснага праекта Дзяржаўнага музея гісторыі беларускай літаратуры і Дзяржаўнага музея Л.М.Талстога (г.Масква). Экскурсію правядзе куратар праекта – навуковы супрацоўнік навукова-экспазіцыйнага аддзела Паліна Мікалаеўна Саўген.

Ілля Рэпін стварыў шэраг партрэтаў Льва Талстога, якія сталі кананічнымі і трывала ўвайшлі ў масавую свядомасць некалькіх пакаленняў. Як бліскучыя мастацкія рашэнні Рэпіна сталі «мемамі» ўжо пры жыцці пісьменніка? Як Рэпін удзельнічаў у стварэнні папулярнага іміджа Талстога? Экспазіцыя спрабуе дэканструіраваць міф пра Талстога і адказаць на пытанне, якая роля ў яго стварэнні належыць Рэпіну.

Мастацкія адкрыцці, зробленыя Рэпіным – вынік блізкіх узаемаадносін абодвух майстроў, якія доўжыліся роўна 30 гадоў. Рэпін адзначаў, што цягнуўся да Талстога “по закону притяжения малых тел к большим”. Талстой здзіўляў яго маштабам сваёй асобы, натхняў сваім унутраным агнём. Рэпін прызнаваўся, што побач з Талстым ён адчуваў сябе як загіпнатызаваны, не падпарадкавацца яго волі было немагчыма…

Экспазіцыя таксама дае магчымасць убачыць сувязь Льва Талстога і Іллі Рэпіна з Беларуссю. Ілля Рэпін стварыў на Беларусі шэраг мастацкіх прац, якія ўвайшлі ў скарбонку сусветнага выяўленчага мастацтва.

Чакаем вас па адрасе: г.Мінск, вул. М.Багдановіча, 13.

Кошт: уваходны квіток (1,5 – 3 руб.) + экскурсія (6 руб.).

Выстава будзе дзейнічаць па 26 чэрвеня 2022 года.

Папярэдні запіс па тэл.: +375 (17) 395-44-47.