“…А думкі нейкай цеплынёй сагрэты.
Далёка да зімы!
Як добра адпачыць!
Якое доўгае бывае лета!”

Ул.Караткевіч

40 гадоў таму не стала Уладзіміра Сямёнавіча Караткевіча, але і да гэтай пары ён застаецца адным з самых любімых і чытаных пісьменнікаў у нашай краіне – працягваецца выданне поўнага збору твораў, перавыдаюцца знакавыя раманы і аповесці, ладзяцца канцэрты і выстаўкі.

На часовай экспазіцы “Якое доўгае бывае лета!” супрацоўнікі філіяла “Літаратурны музей Максіма Багдановіча” прадстаўляюць пісьменніка ў незвычайным ракурсе – праз матэрыялы, звязаныя з “летнім адпачынкам” Уладзіміра Караткевіча.

Словы вышэй нездарма ўзяты ў двукоссе, бо, у адрозненне ад прадстаўнікоў многіх іншых прафесій, cапраўдны пісьменнік не мае адпачынку ў звычайным сэнсе  гэтага слова. Ты ніколі не ведаеш, у які момант да цябе прыйдзе натхненне, альбо якое ўражанне ператворыцца потым у верш, апавяданне ці нават нешта большае.

Праз фотаздымкі, рукапісы, колкія эпіграмы, прыжыццёвыя выданні Уладзіміра Караткевіча з фондаў установы “Дзяржаўны музей гісторыі беларускай літаратуры” і філіяла “Літаратурны музей Максіма Багдановіча” вы зможаце пабачыць пісьменніка рыбаком і курортнікам, краязнаўцам і даследчыкам, і нават ваенным журналістам Ціхаакіянскага флоту, праз жаданне набрацца новых уражанняў.

Выстава працуе з 15 жніўня па 13 верасня 2024 года.

Уваход вольны (10+).

Адрас: г. Мінск, вул. М.Багдановіча, 7а.

Тэл. +375 17 363 07 61, + 375 17 355 22 95.