27 красавіка а 13-й гадзіне Дзяржаўны музей гісторыі беларускай літаратуры запрашае на экскурсію па выставе «“Вайна і мір” Л.М. Талстога: месца дзеяння Беларусь», створанай сумесна з Дзяржаўным музеем Л.М. Талстога (г. Масква). Экскурсію правядзе куратар – старшы навуковы супрацоўнік музея Ірына Князева.
Тэма выставы – частка шырокага гісторыка-філасофскага зместу кнігі Льва Талстога, які ўвасобіўся ў эпічным расповядзе пра падзеі Айчыннай вайны 1812 года. У рамане “Вайна і мір” Талстой разважаў у тым ліку пра заканамернасць руху народаў Еўропы з Захаду на Усход і з Усходу на Захад – наступленні напалеонаўскіх войскаў ад заходніх межаў Расійскай імперыі, супадаючых з сучаснымі межамі і землямі Беларусі, да Смаленска і Масквы, а затым – адступленні да Парыжа.
На выставе прадстаўлена каля 80 экспанатаў з фондаў Дзяржаўнага музея Л.М. Талстога: гістарычныя гравюры і літаграфіі сцэнаў Айчыннай вайны 1812 года аўтарства Клаубера, Альберта Адама, Фабер-дзю-Фора, ілюстрацыі да кнігі “Вайна і мір” мастакоў А. Апсіта, М.А. Волкава, В.А. Сярова і А.В. Нікалаева; фотаздымкі Льва Талстога і яго сям’і, унікальныя чарнавыя рукапісы і лісты.
Экспазіцыю дапаўняюць фотаздымкі, рукапісы і кнігі, звязаныя з раманам, прадстаўленыя Дзяржаўным музеем гісторыі беларускай літаратуры.
Зацікаўлены наведвальнік зможа:
- прасачыць за рухам думкі пісьменніка і знайсці ўласныя адказы на пастаўленыя філасофскія пытанні;
- паглыбіцца ў свет творчых планаў аўтара, зафіксаваных у рукапісных накідах, незавершаных прадмовах і ранніх рэдакцыях кнігі “Вайна і мір”;
- убачыць сляды складанай даследчыцкай і духоўнай працы, якія захаваліся ў дакументах і ліставанні з членамі сям’і, сябрамі і знаёмымі;
- наблізіцца да разумення аўтарскай задумы, увасобленай ў гісторыка-мастацкім спалучэнні вобразаў ваеннага, палітычнага і прыватнага жыцця “вялікай эпохі”;
- пабачыць ілюстрацыі да славутага твора, гістарычныя гравюры і рэпрадукцыі, на якіх адлюстраваны апісаныя ў рамане баі, што адбываліся на тэрыторыі сучаснай Беларусі (пераход праз Неман, бой пад Салтанаўкай, бітва на Беразіне і інш.);
- даведацца пра помнікі і памятныя мясціны ў беларускіх гарадах і вёсках, звязаных з падзеямі вайны 1812 года;
- натхніцца на прачытанне (перачытанне) славутага рамана.
Шчыра запрашаем, шаноўныя сябры!
Квіткі: 10,00 руб.
Запіс: +375 17 363 94 65, +375 17 395 44 47.
