21 сакавіка 2026 года ў Дзяржаўным музеі гісторыі беларускай літаратуры адбылося святкаванне Сусветнага дня паэзіі і 186-годдзя з дня нараджэння Францішка Багушэвіча, вядомага пад псеўданімам Мацей Бурачок.

Мерапрыемства аб’яднала аматараў літаратуры, даследчыкаў і творчых людзей. Праграма пачалася з лекцыі Змітра Юркевіча «Радаводныя таямніцы і сяброўскія сувязі Францішка Багушэвіча», якая выклікала жывую цікавасць слухачоў і дазволіла па-новаму зірнуць на постаць паэта.

Цягам дня госці ўдзельнічалі ў творчых майстар-класах: па вышыўцы па фотаздымках пад кіраўніцтвам Ганны Сілівончык, роспісе сурвэтак у стылі маляванкі «Dudka białaruskaja» з Ірынай Князевай, а таксама пазнаёміліся з асновамі беларускай лацінкі.

Завяршылася мерапрыемства куратарскай экскурсіяй Валянціны Кароткінай па выставе «Адкуль узяўся Бурачок?..», якая стала лагічным вынікам дня і дапамагла глыбей зразумець культурны кантэкст эпохі паэта.

Свята прайшло ў цёплай, творчай атмасферы і пацвердзіла цікавасць публікі да беларускай паэзіі і літаратурнай спадчыны.