19 чэрвеня, у дзень нараджэння народнага пісьменніка Беларусі Васіля Быкава, у Музеі-дачы Васіля Быкава адбылося адкрыццё выставы “Партрэты Васіля Быкава ў творчасці беларускіх мастакоў”.
У мерапрыемстве прынялі ўдзел мастакі – удзельнікі выставы – Святлана Баранкоўская (на выставе экспануецца яе габелен “Апостал”) і Уладзімір Вішнеўскі (на выставе прадстаўлены афорты “Апостал Васіль” і “Дзяды”). Ірына Князева, загадчык філіяла, правяла куратарскую экскурсію па выставе і прадставіла маляваны дыван асабістага аўтарства.
На мерапраемства завітаў Міхаіл Бараноўскі, паэт, бард, у выкананні якога прагучалі аўтарскія песні. Сяброўская нязмушаная атмасфера мерапрыемства натхніла на спевы нават дзяцей.
Нагадваем, што заўтра 22 чэрвеня, у межах Быкаўскіх дзён у Музеі-дачы уваход вольны. Завітвайце, каб ушанаваць памяць пісьменніка!