30 красавіка 2024 года ў Дзяржаўным музеі гісторыі беларускай літаратуры пройдзе навукова-практычны семінар “Інструменты для прыцягнення новых наведвальнікаў у літаратурны музей” для супрацоўнікаў літаратурных музеяў краіны. Пачатак – аб 11-й гадзіне (рэгістрацыя – з 10:00).

Нягледзячы на тое, што музеі бесперапынна трансфармуюцца пад уздзеяннем зменлівага навакольнага свету, гэтага часам бывае недастаткова, каб выйсці на адзін узровень з іншымі рэкрэацыйнымі ўстановамі. Супрацоўнікі музея ўвесь час мусяць вырашаць пытанні адсутнасці цікавасці ў наведвальнікаў, неадпаведнасці экспазіцый уяўленням сучасных людзей, якія выраслі ў свеце інтэрнэту і высокіх тэхналогій. Зрэшты музей з’яўляецца адукацыйнай установай, для наведвання якой патрабуецца дадатковая падрыхтоўка. Гэты фактар таксама адштурхоўвае патэнцыяльную аўдыторыю. Для літаратурных музеяў пытанне прыцягнення наведвальнікаў стаіць тым больш востра, бо яны традыцыйна лічацца найменш атракцыйнымі ў параўнанні, напрыклад, з музеямі гістарычнага або мастацкага профілю.

Навукова-практычны семінар ладзіцца Дзяржаўным музеем гісторыі беларускай літаратуры з мэтай абагуліць досвед айчынных літаратурных музеяў у кірунку сучасных падыходаў да музейнай дзейнасці па прыцягненні наведвальнікаў. Відавочна, што наспела неабходнасць музейнай супольнасці сабрацца разам, каб пашукаць адказаў на актуальныя пытанні, падзяліцца меркаваннямі, прафесійнымі кейсамі і метадычнымі здабыткамі.

У семінары возьмуць удзел каля 20 дзяржаўных літаратурных музеяў рэспублікі.

У праграме:

• пленарнае пасяджэнне з удзелам прадстаўнікоў Міністэрства культуры Рэспублікі Беларусь;
• выступленне дакладчыкаў;
• прэзентацыя новай інтэрактыўнай музейнай праграмы Дзяржаўнага музея гісторыі беларускай літаратуры.

Семінар пройдзе па адрасе г.Мінск, вул.М.Багдановіча, 13.

Кантактная асоба – Калядчык Наталля Валер’еўна, вучоны сакратар (+375 33 661 63 97).

Запрашаем прадстаўнікоў СМІ наведаць мерапрыемства і падтрымаць яго інфармацыйна. Акрэдытацыя па тэл. +375 17 363 94 65.