4 сакавіка ў Літаратурным музеі Максіма Багдановіча адбылася прэзентацыя мастацкіх твораў цікавай, неардынарнай мастачкі Надзеі Пашкевіч “Максім Багдановiч – пясняр роднага краю”.
Імпрэза распачалася з музычнага нумара – “Ларго з Санаты для скрыпкі сола № 3” Баха – у выкананні Караліны Наско, артысткі Беларускай дзяржаўнай філармоніі. Дарэчы, саму Караліну можна пачуць на канцэрце: https://philharmonic.by/ru/concert/vecher-premer-ansambl-solistov-klassik-avangard
Першая персанальная выстава Надзеі Пашкевіч адбылася ў Мінску ў галерэі “VILNIUS” бібліятэцы №18 горада Мінска. Яе загадчык Кацярына Зверава распавяла пра гэтую падзею і павіншавала Надзею з чарговым вернісажам.
Выстава Надзеі – першы ў гэтым юбілейным годзе падарунак да дня нараджэння Максіма Багдановіча. Яе работы – гэта мастацкае перажыванне пасля прачытання вершаў паэта. Каля кожнай карціны змешчаны верш М.Багдановіча. У наведвальніка выставы ёсць магчымасць адчуць эмацыйныя перажыванні паэта і мастака, а таксама атрымаць новыя ўражанні.
Сваёй выставай Надзея Пашкевіч аддае даніну павагі і любовi да паэзіі вечнага маладога класіка Максіма Багдановіча, праводзячы паралель паміж паэзіяй і жывапісам, паказваючы, што ўся творчасць – адзінства.
Нагадваем, што выстава працуе па 23 сакавіка ў Літаратурным музеі Максіма Багдановіча.