Літаратурны музей запрашае на лекцыю даследчыка Змітра Юркевіча ў межах праекта “Па мячы і па кудзелі.  Гісторыя сям’і – гісторыя асобы”. 

Наступная сустрэча будзе прысвечана ўраджэнцу Случчыны Антону Пяткевічу. У гісторыю беларускай культуры ён увайшоў пад запамінальным псеўданімам – Адам Плуг. Славуты літаратар, перакладчык і рэдактар, сардэчны сябра Уладзіслава Сыракомлі, пакінуў па сабе даволі значную літаратурную спадчыну. Праўда, і па сённяшні дзень імя і творы Адама Плуга, на жаль, застаюцца малавядомымі ў Беларусі.

І як творца, і як чалавек Пяткевіч быў цікавы і свайму, і наступным пакаленням дасдедчыкаў. Адным з першых у паваеннай Беларусі ў сваіх публікацыях заняўся аднаўленнем памяці пра Антона Пяткевіча Адам Мальдзіс. Ён ставіў забытага літаратара ў шэраг пачынальнікаў новай беларускай   літаратуры, побач з Янам Чачотам, Янам Баршчэўскім, Уладзіславам Сыракомлем, Вінцэсем Каратынскім, Арцёмам Вярыга-Дарэўскім і іншымі.

На лекцыі пазнаёмімся з жыццёвым і творчым шляхам літаратара. А таксама, па традыцыі, Зміцер Юркевіч падзеліцца сваімі архіўнымі знаходкамі і раскрые некаторыя новыя звесткі, датычныя сям’і старога беларускага шляхецкага роду Пяткевічаў герба “Трубы”.

Шчыра запрашаем!

Час: 20 лютага 2026, 19:00.

Кошт білетаў: 8 рублёў.

Тэлефон для даведак: +375 17 363 56 21.

Адрас: г.Мінск, вул. М. Багдановіча, 13.