22 мая 2021 года ў Літаратурным музеі Петруся Броўкі адбылося мерапрыемства “Ноч музеяў – 2021: Гістарычны калапс” у рамках адпаведнай міжнароднай акцыі.

Аляксандр Бадылевіч, магістр гістарычных навук, прачытаў лекцыю на тэму “Становішча Элеўсінскіх містэрый у Рымскай імперыі ў I-V стст. н.э.”. Наведвальнікаў зацікавілі містычныя культы і вераванні, гучала шмат пытанняў і адказаў на іх. Прысутныя актыўна ўключаліся ў дыскусію аб гісторыі старажытнаўсходніх грамадстваў, якую вялі гісторыкі Ілля Лапушанскі і Віктар Дзядкоў. Ва ўтульнай атмасферы музейнай ночы гледачы змаглі адпачыць падчас выступлення музыкі Дзяніса Жураўлёва, які граў на хангу інструментальную музыку, што нагадвала касмічныя гукі. Марына Дубень, салістка фальклорна-этнаграфічнага ансамбля “Багач”, прачытала лекцыю “Шыфраваныя пачуцці ў беларускіх народных песнях”. Наведвальнікі цікавіліся сэнсам, закладзеным у пэўныя словы і вобразы, з гатоўнасцю адказвалі на пытанні і загадкі.

Акрамя таго, на працягу ўсяго вечара наведвальнікі ўдзельнічалі ў розных актыўнасцях: атрымлівалі прадказанне будучыні пры дапамозе карт Таро, складалі дракона з паперы, захоплена праходзілі квэст “Пасланне продкаў” па музею, знаёміліся з гісторыяй развіцця шумерскай мовы і складалі сваё імя на ей, весела праводзілі час, гуляючы ў настольную гульню “Растлумач мне, калі ласка!”.

На завяршэнне мерапрыемства малодшы навуковы супрацоўнік Вольга Каваленак парадавала гасцей выкананнем вядомых беларускіх песень пад гітару.