Літаратурны музей запрашае на чарговую лекцыю даследчыка Змітра Юркевіча ў межах праекта “Па мячы і па кудзелі.  Гісторыя сям’і – гісторыя асобы”.  Гэтым разам гаворка пойдзе пра Яўзебія Лапацінскага –  дасведчанага архівіста. У гісторыю беларускай літаратуры Лапацінскі зрабіў значны ўнёсак сваімі даследваннямі пра паэта-земляка Адама Міцкевіча. Яго публікацыі ў папулярных выданнях (“Slowo”, “Kurjer Wilenski”), якія друкаваліся ў 1931–1933 гадах, мелі сенсацыйны характар. Яўзебій Лапацінскі ў папулярнай форме знаёміў чытача з найбольш цікавымі фактамі біяграфіі Адама Міцкевіча, раскрываў іх спрэчныя моманты.

Хоць архівіст і прысвяціў шмат часу продкам паэта, але гэта было не адзінае яго захапленне. Вялікая ўвага даследчыка заўсёды была скіравана на гісторыю мастацтва сваёй радзімы – Вялікакага Княства Літоўскага. Вынікі шматгадовых пошукаў у віленскіх архівах папулярызаваліся Лапацінскім і ў выглядзе лекцый і публікацый.

Ці мог хто падумаць, што з “недавучкі” (але шалёна ўлюбёнага ў гісторыю), маладосць якога насіла па бурлівых хвалях грандыёзных падзей пачатку ХХ стагоддзя, з цягам часу “з’явіцца на свет” эксперт у пэўных пытаннях “міцкевічазнаўства”, гісторыі Вільні і мастацтва былога ВКЛ?

Запрашаем пазнаёміцца з цікавай асобай і дзейнасцю Яўзебія Лапацінскага. На лекцыі Змітра Юркевіча вы даведаецеся і пра беларускі шляхецкі род Лапацінскіх, карані якога сягаюць у часы князя Вітаўта і бітвы пад Грунвальдам.

Час: 29 ліпеня 2026, 19:00.

Кошт білетаў: 8 рублёў.

Тэлефон для даведак: +375 17 363 56 21.

Адрас: вул. М. Багдановіча, 13.