Жывапісец Вінцэнт Дмахоўскі лічыцца заснавальнікам айчыннага архітэктурнага пейзажа. Часам аўтара ўвогуле называюць першым беларускім пейзажыстам. Нягледзячы на значнасць гэтага творцы ў нашай гісторыі мастацтва, біяграфія Дмахоўскага ўсё яшчэ маладаследаваная.

Не заслужыў мастак і стоса манаграфій ды альбомаў з рэпрадукцыямі, А яго палотнаў у Беларусі, напэўна, не засталося зусім. Што да публікацый, то першы айчынны нарыс пабачыў свет у 1971-м у кнізе Леаніда Дробава “Беларускія мастакі ХІХ стагоддзя”. Да асобы Дмахоўскага звярталіся і іншыя мастацтвазнаўцы і краязнаўцы

На наступнай лекцыі даследчыка, архівіста, супрацоўніка газеты “Культура” Змітра Юркевіча у межах праекта “Па мячы і па кудзелі. Гісторыя сям’і – гісторыя асобы” мы паспрабуем узнавіць яго жыццяпіс, далучыўшы як мага больш новых архіўных звестак.

Гаворка пойдзе пра слынны род, чые карані звязаныя з Ашмяншчынай і Браслаўшчынай па бацькоўскай лініі, а па кудзелі яго гісторыя сягае да адной з найстаражытнейшых фамілій Зяновічаў з Полацкага ваяводства. Завочна павандруем і па малой радзіме Вінцэнта Дмахоўскага – ваколіцах Іўя ды Ліды. І канечне, пройдземся шляхам “Клода Ларэна віленскіх ваколіц”, як празвалі мастака сучаснікі.

Шчыра запрашаем!

Час: 25 чэрвеня 2025 года, 19:00.

Кошт білетаў: 8 рублёў.

Тэлефон для даведак: +375 17 363 56 21.

Адрас: г. Мінск, вул. М. Багдановіча, 13.