Літаратурны музей запрашае на чарговую лекцыю даследчыка Змітра Юркевіча ў межах праекта “Па мячы і па кудзелі.  Гісторыя сям’і – гісторыя асобы”.  Гэтым разам гаворка пойдзе пра знакамітага крошынца – Паўлюка Багрыма. У гісторыю беларускай літаратуры ён быў уведзены як сялянскі паэт, аўтар вострасацыяльнага верша “Зайграй, зайграй, хлопча малы…”, напісанага на беларускай мове ў першай палове ХІХ стагоддзя.

Калі скласці біяграфічную даведку аўтара адзінага вядомага верша, то атрымаецца наступнае. Паўлюк Багрым – сын крошынскага слесара Юзафа Багрыма. Вучыўся ў парафіяльнай школцы. Ёсць меркаванне, што выкладанне ў ёй вялося на беларускай мове. Пасля сканчэння школы да восені 1828 года служыў у ксяндза Войцаха Магнушэўскага. У 1829 годзе стаў адной з галоўных фігур у следстве па справе народных хваляванняў. Падазраваўся ў распаўсюдзе антыпрыгонніцкіх вершаў. Працэс скончыўся масавай экзекуцыяй жыхароў Крошына, а з Паўла, які не меў дачынення да хваляванняў, узялі абяцанне больш вершаў не пісаць, не перапісваць і не чытаць… Пазней ён працаваў кавалём. Маючы 52 гады, ажаніўся з удавой, шляхцянкай Карнэліяй Шышлоўскай, удвая маладзейшай за яго. Меў нашчадкаў. Памёр і пахаваны ў Крошыне, на прыкасцёльных могілках. Месца пахавання Паўла Багрыма з’яўляецца гісторыка-культурнай каштоўнасцю.

Але за гэтымі досыць сціслымі звесткамі хаваецца надзвычайнае перапляценне гісторый некалькіх сямей і розных мясцін наваградскіх ды баранавіцкіх ваколіц. Кожная з іх у розны час трапляла пад пільны погляд даследчыкаў-багрымазнаўцаў. Запрашаем пазнёміцца з навуковым і архіўным наробкам на лекцыі ў Літаратурным.

Час: 18 сакавіка 2026, 19:00.

Кошт білетаў: 8 рублёў.

Тэлефон для даведак: +375 17 363 56 21.

Адрас: вул. М. Багдановіча, 13.