Дзяржаўны музей гісторыі беларускай літаратуры

Адкрый для сябе скарбы нацыянальнай літаратуры

BelarusianEnglishGermanRussian

Дзяржаўны музей гісторыі беларускай літаратуры

Дзяржаўны музей гісторыі беларускай літаратуры

BelarusianEnglishGermanRussian

Архіў Максіма Танка папоўніўся новымі прадметамі!

18 верасня Дзень нараджэння беларускага народнага паэта Максіма Танка. І вельмі сімвалічна, што ў фонды Дзяржаўнага музея гісторыі беларускай літаратуры патрапілі дакументы, якія звязаны з яго жыццём. Дачка пісьменніка, Ірына Яўгенаўна, перадала шлюбнае пасведчанне бацькоў і пашпарт роднага дзядькі Максіма Танка (Фадзея Фёдаравіча Скурко).

 

Каханне Максіма Танка і яго жонкі Любові Андрэеўны доўжылася ўсё жыццё. Пазнаёміліся яны ў той час, калі Максім Танк здымаў кватэру ў Вільні ў бацькоў Любові Андрэеўны. У 1940 годзе маладыя ажаніліся ў г. Вілейка. У сям’і народнага паэта нарадзілася трое дзяцей: старэйшы сын Максім і дзяўчаткі-блізняткі Іра і Вера. Сям’я для пісьменніка заўсёды была самым галоўным у жыцці.

Яўген Іванавіч вельмі кахаў сваю жонку і заўсёды ёй дапамагаў у хатніх справах: і посуд мыў, і бульбу чысціў. Яна, у сваю чаргу, была яго галоўным памочнікам на літаратурнай ніве, бо ўсе вершы Максім Танк адразу паказваў ёй. Калі новы верш быў асабліва ўдалы – яго паслухаць збіралася ўся вялікая сям’я Танкаў.

55 год яны пражылі разам і памерлі ў адзін год. Хоць увесь час спрачаліся: кожны хацеў памерці раней. Паэт пражыў пасля каханай некалькі месяцаў і папрасіў, калі ён пойдзе з жыцця, каб іх пахавалі разам. Тэстамент Максіма Танка выканалі. Іх пахавалі разам на роднай Пількаўшчыне. І сёння гэтае пасведчанне – напамін пра вечнае каханне.

 

 

Скурко Фадзей Фёдаравіч – родны брат бацькі Максіма Танка. Лёс дзядзькі знакамітага паэта склаўся вельмі цікава і незвычайна. Ураджэнец Пількаўшчыны аб’ездіў амаль палову зямнога шара. Ён быў вельмі адукаваным чалавекам, ведаў шмат моў, скончыў вышэйшую ветэрынарную школу ў Чэхаславакіі, працаваў у Германіі, а потым адправіўся ў Аргенціну, дзе пражыў цэлых 10 год! За гэты час змяніў там некалькі прафесій: і таксістам быў, і на заводзе працаваў. Зарабіў шмат грошай і вярнуўся ў родную вёску. Працаваў у калгасе і дапамагаў як ветэрынар.