ПРЭС-РЭЛІЗ прэзентацыі часовай экспазіцыі

26 снежня 2018 года а 17-й гадзіне ў Дзяржаўным музеі гісторыі беларускай літаратуры адбудзецца адкрыццё часовай экспазіцыі “Уладзімір Караткевіч. Абуджаная памяць…” (Да 50-годдзя выдання рамана “Каласы пад сярпом тваім”).

Ул. Караткевіч з’яўляецца адным з таленавітых і самабытных прадстаўнікоў таго пакалення беларускіх пісьменнікаў, што прыйшло ў літаратуру ў другой палове 50-х – пач. 60-х гадоў.

Асаблівая заслуга Ул. Караткевіча перад беларускай літаратурай у распрацоўцы гістарычнай тэматыкі. Пісьменнік узняў шырокія пласты нацыянальнай гісторыі, перадаў дух мінулых эпох, стварыў адметныя характары, раскрыў багаты духоўны свет сваіх герояў і звязаў іх асабісты лёс з лёсам народным. У Беларусі ён выканаў тую гістарычную місію, што Вальтэр Скот у Англіі, Генрык Сянкевіч у Польшчы, Алоіс Ірасек у Чэхіі.

На выставе прадстаўлены матэрыялы з фондаў музея (кнігі, фотаздымкі, асабістыя рэчы пісьменніка, ліставанне, рукапісы).

У вечарыне прымуць удзел:

Анатоль Верабей, Анатоль Бутэвіч, Анатоль Вярцінскі, Васіль Зуёнак, Васіль Дранько-Майсюк, супрацоўнікі выдавецтва “Мастацкая літаратура”.

Пад час мерапрыемства прагучаць музычныя кампазіцыі на словы Уладзіміра Караткевіча ў выкананні Міхаіла Бараноўскага і Андрэя Мельнікава.