Рубрыка “Беларускія пісьменнікі – удзельнікі Вялікай Айчыннай вайны”
АЛЯКСЕЙ ПЫСІН
паэт, перакладчык
22 сакавіка 1920 – 27 жніўня 1981
Сённяшні юбіляр Аляксей Пысін прайшоў усю вайну сувязістам – забяспечваў бесперабойную кабельную сувязь пярэдняга краю з камандаваннем. Яго зброяй была вінтоўка, катушка з провадам і палявы тэлефонны апарат.
Пысін удзельнічаў у баях на пяці франтах: Заходнім, Калінінскім, Ленінградскім, 1-м і 2-м Прыбалтыйскіх. Двойчы быў цяжка паранены. Дзень Перамогі салдат Пысін сустрэў у Латвіі, на беразе Балтыйскага мора.
Узнагароджаны медалямі, у тым ліку медалём “За адвагу”.
Нягледзячы на тое, што, будучы салдатам, Аляксей Пысін ніколі не браў у рукі пяро (выключэнне – верш “Часавы”), цэнтрам творчасці паэта з’яўляецца вайна.
Асэнсаванне франтавога вопыту паўстае ў цэласную лірычную сістэму ў зборніку “Мае мерыдыяны” (1965). Мерыдыяны аўтара – гэта нялёгкія жыццёвыя дарогі яго лірычнага героя. Паэт піша пра вайну, пра сум маці і ўдоў. Яго хвалююць звычайныя гульні дзяцей, радуюць малюнкі роднай прыроды, абураюць праявы несправядлівасці.
У паказе вайны Аляксей Пысін адзін з першых і самых моцных сярод усіх беларускіх паэтаў. Яго высокая мастацкая культура і маштабнасць мыслення адразу звяртаюць на сябе чытацкую ўвагу.
