Выстава дзіцячых мастацкіх работ “Горды, моцны птах”

“Ад усіх цяпер патомкі ёсць…”

М. Багдановіч

Выстава дзіцячых малюнкаў “Горды, моцны птах” – своеасаблівая справаздача, прэзентацыя вынікаў мастацкага пленэру ўдзельнікаў арт-майстэрні “Залаты птах” (кіраўнік – Юлія Шаціла), праведзенага ў 2022 годзе ў Літаратурным музеі Максіма Багдановіча.

Юныя творцы наведалі музейную экспазіцыю, падчас экскурсіі пазнаёміліся з біяграфіяй пісьменніка, вясёлымі і сумнымі гісторыямі яго жыцця, знакавымі экспанатамі, мемарыяльнымі прадметамі. Пасля адбылося знаёмства з мастацка-дакументальнай выставай “Пад знакам Страціма”, прысвечанай 130-годдзю з дня нараджэння Максіма Багдановіча і 105-годдзю напісання паэмы “Страцім-лебедзь”.

Дзеці ў музеі самастойна абіралі лакацыю для малявання, а таксама экспанаты, якія ім найбольш спадабаліся. Творчы эксперымент па асваенні музейнай прасторы, звязанай з імем самага маладога класіка беларускай літаратуры Максіма Багдановіча, прызнаны паспяховым і юнымі мастакамі, і музейнымі супрацоўнікамі.

Назва мастацкай выставы “Горды, моцны птах” з’явілася невыпадкова. Па-першае, яна пераклікаецца з назвай арт-майстэрні “Залаты птах”. Па-другое, як заўважылі супрацоўнікі музея, юных мастакоў моцна закрануў вобраз Страцім-лебедзя і яго трагічны лёс.

Па ўспамінах, калі паэт першы раз чытаў паэму сваім сябрам, ён агаварыўся, і апошні радок прагучаў так: “Ад усіх цяпер патомкі ёсць, акрамя Максімавых…” (замест “Страцімавых”). За гэтай агаворкай – мара пра ўласных дзетак і разуменне, што мара не ажыццявіцца. У Максіма няма прамых “патомкаў”, яго сімвалічнымі нашчадкамі становімся мы ўсе… І юныя мастакі, удзельнікі арт-майстэрні “Залаты птах”, таксама.

Адрас: г. Мінск, вул. М.Багдановіча, 7а.

Тэл.: +375 (17) 363 07 61, +375 (17) 355 22 95.