25 верасня 2026 года ў фае Дзяржаўнага музея гісторыі беларускай літаратуры пачынае працу фотаэкспазіцыя «Жаночыя твары беларускай літаратуры», прысвечаная Году беларускай жанчыны. На выставе прадстаўлены фотапартрэты (павялічаныя копіі) дзесяці беларускіх пісьменніц, зробленыя ў 1960–1980-я гады. Вера Вярба, Валянціна Коўтун, Яўгенія Янішчыц, Ніна Мацяш, Раіса Баравікова, Алена Васілевіч, Нэла Тулупава, Валянціна Аколава, Эдзі Агняцвет, Таіса Бондар – кожная з іх паўстае перад гледачом у сваім, непаўторным вобразе.

Аўтар фота – Уладзімір Андрэевіч Крук (1927–2008) – вядомы беларускі фатограф і фотакарэспандэнт, больш за трыццаць гадоў жыцця якога былі звязаны з газетай «Літаратура і мастацтва». З 1957 па 1991 год ён працаваў яе штатным фотакарэспандэнтам, супрацоўнічаў таксама з часопісам «Тэатральная Беларусь». Не маючы спецыяльнай прафесійнай адукацыі, Уладзімір Крук больш за 45 гадоў прысвяціў фатаграфіі, стварыўшы вялікі фоталетапіс культурнага жыцця Беларусі.

Задуменная і засяроджаная Ніна Мацяш, спакойная і мяккая Таіса Бондар, маладая, рамантычная Раіса Баравікова… Перад намі не «парадныя» вобразы пісьменніц, а натуральныя, пазбаўленыя афіцыйнасці партрэты. Пазіраванне не выглядае пастаўленым – наадварот, здаецца, што гэтыя моманты выпадкова падгледжаныя. Глядач не сустракаецца з жанчынамі позіркам непасрэдна, а нібыта становіцца сведкам асабістага, амаль інтымнага моманту.