Прэзентацыя кнігі “Архіўныя матэрыялы да жыцця і дзейнасці Адама Багдановіча”

Зусім нядаўна пабачыла свет кніга “Архіўныя матэрыялы да жыцця і дзейнасці Адама Багдановіча. Сшытак 6”. Яна працягвае традыцыю выдання музейных сшыткаў. У фондах Літаратурнага музея Максіма Багдановіча захоўваецца найбагацейшы архіў Адама Багдановіча, які ўключае сотні дакументаў, рукапісаў, машынапісаў і лістоў.

Шосты сшытак склала непублікаваная раней мемуарная спадчына Адама Ягоравіча Багдановіча, прысвечаная яго нарадавольчай дзейнасці. Таксама ў зборніку прадстаўлены эпісталярыі акрэсленай тэматыкі. Выданне знаёміць з гісторыяй грамадска-палітычнага і культурнага жыцця Мінска і Беларусі другой паловы ХІХ ст.

27 студзеня ў 19:00 запрашаем на прэзентацыю музейнай кніжнай навінкі. Падчас сустрэчы вас чакае расповяд пра самыя яркія моманты з мемуараў Адама Багдановіча, а таксама цікавосткі з жыцця нясвіжскіх семінарыстаў і мінчукоў ХІХ ст. ад укладальніка Валянціны Кароткінай. У сустрэчы таксама возьмуць удзел даследчыкі-багдановічазнаўцы і супрацоўнікі музея, якія падзеляцца сваім поглядам на асобу Адама Багдановіча.

Уваход вольны.

Узроставая катэгорыя: 12+.

Тэлефоны для даведак: +375 17 363 07 61, +375 17 355 22 95.

Адрас: вул. М. Багдановіча, 7а.