Як бы магла выглядаць у колеры страчаная архітэктурная спадчына Беларусі, каб яна ўсё ж збераглася? Як яе ўбачыць, калі ад асобных помнікаў не захавалася нават цаглінкі ці дошчачкі?

Марыя Каралёва, карыстаючыся лёгкасцю і празрыстасцю акварэлі, абуджае гонар і цікавасць да беларускай гісторыі і культуры. На аснове фотаздымкаў, графічных прац, малюнкаў не проста рэканструюе, а стварае ў гледача шчымлівы настрой, калі ўсведамляеш, як лёгка страціць у віхурах гісторыі веліч і прыгажосць даўніх будынкаў.

Аб’екты на акварэлях максімальна разнастайныя, як па знешнім выглядзе, так і па прызначэнні. Касцёлы, цэрквы, сінагогі, сядзібы, мячэты, драўляныя і мураваныя, адзінае, што іх аб’ядноўвае – няма магчымасці ўбачыць іх на сваіх месцах сёння.

Асобна варта адзначыць захапленне Марыі Каралёвай паперай, якое з’явілася яшчэ ў мастацкім каледжы і ўвасобілася ў асобны праект “Свяцільні”. Вядомыя шырокаму колу гледачоў як лайт-боксы, у аўтарскай версіі атрымалі беларускія сюжэты. Кожная свяцільня – гэта маленькі цуд з зімовым каларытам і прывітанне Максіму Багдановічу, бо гэта мясціны звязаныя з яго жыццём і творчасцю.

Выстава працуе з 30 снежня 2025 года па 16 сакавіка 2026 года.

Адрас: г. Мінск, вул. М.Багдановіча, 7а (Літаратурны музей Максіма Багдановіча).

Тэл. +375 29 101 71 47, +375 17 363 07 61.