26 лістапада ў Дараганаўскай сярэдняй школе Асіповіцкага раёна адбылася Літаратурная гасцёўня “Міхась Лынькоў: жыццё, прысвечанае літаратуры і народу”, прымеркаваная да 125-годдзя з дня нараджэння пісьменніка.

На мерапрыемства былі запрошаны супрацоўнікі Дзяржаўнага музея гісторыі беларускай літаратуры: намеснік дырэктара па навуковай рабоце А.А.Кузняцова, вучоны сакратар Н.В.Калядчык і загадчык аддзела ўліку, навуковай апрацоўкі і захоўвання фондаў І.М.Скок. Алеся Аляксандраўна распавяла ўдзельнікам сустрэчы пра архіў пісьменніка, які захоўваецца ў музеі, прадэманстравала фотаздымкі і асабістыя рэчы Міхася Ціханавіча.

Мерапрыемства наведала і падзялілася цёплымі ўспамінамі пра Міхася Лынькова яго родная пляменніца Шалабодава Алена Мікітаўна. У выкананні паэтаў – сяброў літаратурнага аб’яднання Асіповіцкага раёна “Літаратар” Тамары Кавальчук і Аляксандра Анюхоўскага прагучалі вершы, прысвечаныя Міхасю Лынькову.

Госці і ўдзельнікі мерапрыемства наведалі школьны музей і дом, у якім доўгі час пражывала родная сястра Міхася Лынькова Ганна Ціханаўна, настаўніца Дараганаўскай школы.