28 лістапада 2024 года а 18-й гадзіне ў Літаратурным музеі Петруся Броўкі адбудзецца адкрыццё ўнікальнай часовай экспазіцыі “Пятрусь Броўка без гальштука”.

Пятрусь Броўка вядомы як народны паэт Беларусі, грамадскі дзеяч і галоўны рэдактар Беларускай савецкай энцыклапедыі, у сваім паўсядзённым жыцці быў чалавекам з гумарам і далікатнасцю ў размове, прывабнай прастатой, клопатам пра сям’ю і сяброў. Менавіта гэтую грань славутага паэта, якая звычайна застаецца па-за ўвагай афіцыйных біяграфічных звестак, дае магчымасць убачыць наша выстава.

Экспазіцыя раскажа пра яго творчы час у Доме творчасці ў Каралішчавічах, сустрэчы з сябрамі на лецішчы ў Ждановічах, паездкі ў Пуцілкавічы і побыт у мінскіх кватэрах. Фатаграфіі, асабістыя рэчы, рукапісы і нават хатні пінжак паэта дапамогуць наведвальнікам убачыць Петруся Броўку не на трыбуне ці на старонках даведніка, а ў яго штодзённым жыцці — за кубкам гарбаты, у размовах з блізкімі, сярод сваіх “агародзікаў” у Каралішчавічах. Асаблівы акцэнт зроблены на малавядомых эпізодах з яго жыцця: кур’ёзах з сябрамі, трапных жартах і душэўных лірычных радках, якія нараджаліся ў тых самых “хатніх” момантах.

Запрашаем вас зазірнуць у жыццёвы альбом Петруся Броўкі і адкрыць яго наноў — як звычайнага чалавека, суседа, сябра, мужа і бацьку.

Уваход на адкрыццё вольны.

Экспазіцыя будзе дзейнічаць да 31 жніўня 2025 года.

Адрас: г. Мінск, вул. К.Маркса, 30.

Кантактны тэлефон: +375 (17) 342-09-81.