Падчас дадатковых зімовых канікул прапануем малодшым школьнікам правесці час з карысцю ў сценах Літаратурнага дома.
Запрашаем далучыцца да музейна-педагагічных заняткаў, якія пазнаёмяць навучэнцаў з этнаграфічнымі прадметамі, казкамі, музеямі, беларускімі традыцыямі і інш.
Занятак “Знаёмся, я – музей!” дасць магчымасць паглыбіцца ў асяродак музейнай культуры, пазнаёміць з правіламі паводзін у музеі, некаторымі тэрмінамі і прафесіямі. Занятак падрыхтуе школьнікаў да наведвання музеяў, а таксама навучыць беражліваму стаўленню да музейных экспанатаў.
Занятак “Як хлеб да нас на стол прыйшоў” пройдзе ў форме казкі-гульні, заснаванай на народнай казцы “Лёгкі хлеб”. Юныя ўдзельнікі ўзгадаюць сюжэт і герояў казкі, пазнаёмяцца з земляробчым побытам і сельскагаспадарчымі прыладамі працы беларусаў, складаным і крапатлівым працэсам вырабу хлеба. Падчас занятка ладзяцца вясёлыя спаборніцтвы-эстафеты. Набытыя веды ўдзельнікаў правяраюцца з дапамогай этнаграфічных загадак.
Занятак “Нізка беларускіх казак” у займальнай форме пазнаёміць наведвальнікаў з дзівосным светам беларускіх народных казак. Удзельнікаў чакаюць незабыўныя сустрэчы з цікавымі героямі ды міфічнымі істотамі, а таксама мудрагелістыя заданні, праз якія будзе пралягаць шлях да фініша.
Занятак “Фэсцік. Гулянне ў народным стылі” перанясе хлопчыкаў і дзяўчынак у прастору старажытнага беларускага фэста – свята ў традыцыйным стылі з вясёлымі гульнямі і цікавымі конкурсамі. Удзельнікі пачуюць, як гучаць розныя музычныя інструменты: бубен, дудка, цымбалы, клякотка, трашчотка; даведаюцца з якой нагоды і кім яны выкарыстоўваліся. Паспрабуюць свае здольнасці ў ролі збіральнікаў ільна (гульня “Садзі лянок”), а таксама папрактыкуюцца ў выкананні народных танцаў (флэшмоб “Маразуля”).
Папярэдні запіс абавязковы.
Кошт уваходнага квітка: 3 руб.
Тэлефон для запісу: +375 17 363 56 21.
Чакаем вас у Літаратурным музеі па адрасе г.Мінск, вул. М.Багдановіча, 13.