20 мая Літаратурны музей Петруся Броўкі прыняў удзел у міжрэгіянальнай навукова-практычнай канферэнцыі з міжнародным удзелам “XI Іванаўскія чытанні” ў Літаратурным музеі імя К.Іванова (Чэбаксары, Расійская Фэдерацыя). Старшы навуковы супрацоўнік Літаратурнага музея Петруся Броўкі Карына Кушчанка прадставіла даклад на тэму “Беларуска-чувашскія літаратурныя сувязі ХХ стагоддзя: пераклады Пятра Хузангая і Антона Салміна паэзіі Петруся Броўкі”. З дапамогай дакументаў і кніг з фондаў Літаратурнага музея Петруся Броўкі былі разгледжаны сяброўскія і творчыя сувязі паміж беларускімі і чувашскімі пісьменнікамі.

Старшы навуковы супрацоўнік Літаратурнага музея Габдуллы Тукая (філіял ДБУК “Нацыянальны музей Рэспублікі Татарстан”, г. Казань) Лена Цябіна распавяла пра экскурсійна-тэатральны маршрут, створаны музеем паводле мясцін татарскага паэта, пад назвай “Адрасы душы. Тукай”. З дакладам “Янка Купала – у дыялогу культур” выступіла Рымма Абызава, загадчыца Мемарыяльнага музея-кватэры Янкі Купалы ў с. Пячышчы (філіял ДБУК “Нацыянальны музей Рэспублікі Татарстан”). На працягу многіх гадоў музей папулярызуе беларускую культуру ў Татарстане праз творчасць Янкі Купалы. Заслужаны настаўнік Чувашскай Рэспублікі Гяронцій Нікіфараў азнаёміў прысутных з дакладам, прысвечаным паэту Івану Віктараву. Чувашскі творца падчас Вялікай Айчыннай вайны быў разведчыкам у беларускім партызанскім атрадзе і загінуў у канцлагеры горада Барысаў.

Канферэнцыя ўзняла актуальныя праблемы чувашскай літаратуры і сучасныя тэндэнцыі развіцця літаратурных музеяў. Усяго сёлета ў навуковай канферэнцыі прынялі ўдзел больш за 20 чалавек – супрацоўнікі музеяў, бібліятэк і адукацыйных устаноў, краязнаўцы, студэнты і выкладчыкі ВНУ.