9 мая, у Дзень Перамогі, запрашаем на адмысловую тэматычную лекцыю “Крывёю Сэрца”, прысвечаную пісьменнікам-удзельнікам Вялікай Айчыннай вайны.

У часы ваеннага ліхалецця беларускія літаратары апынуліся ў розных абставінах: хтосьці застаўся на акупаванай тэрыторыі, нехта на момант пачатку вайны ўжо служыў у войску або быў мабілізаваны ў першыя ж дні, іншыя апынуліся ў эвакуацыі далёка ад беларускіх зямель. Удзел у барацьбе з нямецка-фашысцкімі захопнікамі таксама быў розным, як і яго адбітак на лёсах пісьменнікаў.

Са зброяй у руках на розных участках фронту змагаліся Змітрок Астапенка, Анатоль Вялюгін, Васіль Быкаў, Іван Мележ, Паўлюк Прануза, Зінаіда Бандарына, Мікола Сурначоў, Іван Шамякін, Аркадзь Куляшоў.

Пачаўшы вайсковую службу яшчэ ў 1939 годзе і перажыўшы жахі палону, у партызанскай барацьбе ўдзельнічаў Янка Брыль.

Паэтычным словам і канкрэтнымі дзеяннямі змагаліся з акупантамі пісьменнікі, якім давялося жыць і дзейнічаць на акупаванай тэрыторыі: Валянцін Таўлай, Анатоль Іверс, Уладзімір Калеснік, Сяргей Новік-Пяюн.

Важным сродкам прапаганды і падтрымкі баявога духу былі газеты, што выдаваліся як у тыле ворага, так і ў падполлі: “Савецкая Беларусь”, “Звязда”, “За Савецкую Беларусь”, “За свабодную Беларусь”, “Раздавім фашысцкую гадзіну”, “Партызанская дубінка”. Многія пісьменнікі актыўна супрацоўнічалі з імі: друкавалі свае творы, працавалі ў рэдакцыях, былі ваеннымі карэспандэнтамі — Кандрат Крапіва, Міхась Лынькоў, Пімен Панчанка, Максім Танк, Васіль Вітка.

Пра найбольш яскравыя падзеі і ўспаміны ваенных гадоў пойдзе гаворка на аўтарскай лекцыі Валянціны Кароткінай “Крывёю сэрца”. Таксама прагучаць вершы з аднайменнага паэтычнага зборніка.

Час: 9 мая, 16:00.

Кошт: 10 рублёў.

Тэлефон для даведак: +375 17 363 56 21.

Адрас: вул. М. Багдановіча, 13.