Дзяржаўны музей гісторыі беларускай літаратуры
Дзяржаўны музей гісторыі беларускай літаратуры – гэта адзін з буйнейшых літаратурных музеяў нашай краіны і адзіны літаратурны музей, які займаецца дакументаваннем літаратурнага працэсу на Беларусі ў шырокім гістарычным кантэксце: ад часоў узнікнення пісьменства да сённяшніх дзён.
Літаратурны музей Максіма Багдановіча
Музей прэзентуе спадчыну маладога генія беларускай паэзіі пачатку ХХ стагоддзя, аўтара кнігі “Вянок” і вершаў “Слуцкія ткачыхі”, “Зорка Венера”, “Пагоня”, якія сталіся сімваламі беларускай культуры. Класічная экспазіцыя і сучасныя мультымедыйныя тэхналогіі пазнаёмяць з жыццём Багдановіча.
Літаратурны музей Петруся Броўкі
Адзіны мемарыяльны музей-кватэра паэта ў Беларусі. Размешчаны ў адным з нямногіх ацалелых у Мінску пасля Другой сусветнай вайны будынкаў у стылі мадэрн (архітэктар Г.Гай). У кватэры №4 з 1951 па 1980 год жыў народны паэт Беларусі Пятрусь Броўка. Экспазіцыя складаецца з мемарыяльнай і дакументальнай частак.
Беларуская хатка
Музей распавядае пра апошнюю сустрэчу Максіма Багдановіча з Радзімай. Поўнае пагружэнне ў гісторыю чакае наведвальніка ў мемарыяльным пакоі паэта, а экспазіцыя знаёміць з літаратурным і грамадскім жыццём Мінска пачатку ХХ стагоддзя. Завяршаецца экскурсія сцэнкамі з батлейкі, пра аднаўленне якой марыў Максім.
Музей-сядзіба Францішка Багушэвіча "Кушляны"
Музей з’яўляецца ўнікальным месцам для аматараў беларускай літаратуры, дзе захаваная сядзіба (1896 г.), стары парк і абора даюць магчымасць уявіць, як выглядаў шляхецкі маёнтак пісьменніка ў XIX стагоддзі. Менавіта ў Кушлянах Францішак Багушэвіч карпатліва працаваў над складаннем слоўніка беларускай мовы і напісаннем вершаў для новых зборнікаў.
Музей-сядзіба Міцкевічаў "Завоссе"
У 1998 годзе, да 200-годдзя Адама Міцкевіча, сядзіба “Завоссе” была адноўлена па малюнках Эдуарда Паўловіча і Напалеона Орды. Сядзіба стала музеем, экспазіцыя якога прадстаўляе сабой шляхецкі двор другой паловы ХVІІІ ст. і падобная да жывой ілюстрацыі паэмы «Пан Тадэвуш».
Музей-дача Васіля Быкава
Музей адкрыўся ў 2014 годзе. Галоўная адметная рыса музея ў яго максімальнай мемарыяльнасці: пакінута ўсё як пры жыцці Васіля Быкава. Экспазіцыя паказвае побыт пісьменніка і савецкага інтэлігента сярэдзіны 1980-х гадоў. Кожны прадмет нагадвае пра тое, што калісьці тут кіпела жыццё, напоўненае радасцю і любоўю.
Літаратурны музей Кузьмы Чорнага
У Цімкавічах прайшло дзяцінства і юнацтва будучага пісьменніка, з гэтымі мясцінамі і людзьмі ён быў звязаны ўсім сваім жыццём і творчасцю. Першы музей (з 1962 г.) быў школьным, а ў 1993 г. пераўтварыўся ў літаратурны. Экспазіцыя ўсебакова раскрывае творчую асобу Кузьмы Чорнага – празаіка, публіцыста, драматурга і памфлетыста.
Фальварак Ракуцёўшчына
Месца сімвалічнага вяртання Максіма Багдановіча на Беларусь, у шчаслівае лета 1911 года, напоўненае творчасцю і сустрэчамі з сябрамі. Наведвальніка чакае ўтульная атмасфера старога фальварка і крыніца “жывой вады”, якая натхняла паэта.
