У Літаратурным музеі працуе выстава “Фіялкі зімою: жаночыя постаці пакалення асвечаных”. Экспазіцыя прысвечана літаратуры апошняй трэці ХVIII-першай паловы ХІХ стст., прадстаўленай праз творчасць жанчын-літаратарак эпохі Асветніцтва.

Напэўна, найбольш вядомая сярод гераінь экспазіцыі, Ганна Цюндзявіцкая. Яе кніга не была творам паэтычным ці празаічным. Гэта быў падручнік па хатняй гаспадарцы, рэч патрэбная і карысная. Таму кніга вытрымала 14 перавыданняў.

На першы погляд жыццё літаратаркі магло здавацца звычайным лёсам шляхцянкі, якая вяла гаспадарку і выхоўвала дзяцей. Аднак яна здолела ператварыць практычныя веды, назіранні і досвед свайго асяроддзя ў кнігі, што карысталіся попытам на працягу дзесяцігоддзяў.

У 1848 годзе ў Вільні выйшла яе кніга «Літоўская гаспадыня» – практычны дапаможнік па вядзенні хатняй гаспадаркі. Поўная назва дакладна перадавала змест і маштаб выдання: «Літоўская гаспадыня, або Навука прыстойнага ўтрымання дому і забеспячэння яго ўсімі прыправамі, кухоннымі, аптэчнымі і гаспадарчымі запасамі, а таксама гадавання і ўтрымання жывёлы, птушкі і іншых істот, паводле спосабаў самых выпрабаваных і правераных вопытам, і разам з тым самых танных і простых».