Фотавыстава Кацярыны Аракчэевай “ЭТНАСУСВЕТ”

30 верасня а 19-й запрашаем у Літаратурны на адкрыццё фотавыставы Кацярыны Аракчэевай “ЭТНАСУСВЕТ”.

У персанальным праекце ЭТНАСУСВЕТ Кацярына Аракчэева прадстаўляе фотаздымкі, створаныя на працягу 2023 – 2026 гадоў. Гэта галерэя партрэтаў сучасных беларусак у традыцыйных аўтэнтычных касцюмах. Унікальнасць праекта ў тым, што звычайныя людзі на дзве гадзіны фотасесіі апраналі рэчы музейнай каштоўнасці, якім больш за 100 год, і якія звычайна недасяжныя для карыстання і застаюцца ў вітрынах. Падчас фотасесій выкарыстоўваліся беларускія народныя строі з прыватных калекцый або вельмі дакладныя рэканструкцыі. Гледзячы на фотаздымкі, можна ўявіць, як маглі б выглядаць нашыя продкі. Гэта атрымалася вельмі цікава – назіраць за тым, як мяняецца аблічча, постаць, позірк жанчыны ў строі, як яна адчувае сябе ў гэтым старадаўнім уборы.

Праект ЭТНАСУСВЕТ стаўся позіркам у залюстроўе, дзе мінулае і сучаснасць сустракаюцца ў адным фотаздымку. Мадэлі, апранаючы народны касцюм, паглыбляліся ў сусвет хараства народных традыцый. Аўтарцы вельмі хацелася падкрэсліць сваё захапленне прыгажосцю нашых жанчын. Гэтыя партрэты паказваюць: сапраўдная прыгажосць не ведае часу. Яна жыве ў нашых генах, прарастае праз арнаменты і ззяе ў вачах кожнай беларускі. Гэта падарожжа ў глыбіню стагоддзяў праз позірк сучаснай беларускай жанчыны.

Адна з мэтаў выставы: каб як мага больш людзей змаглі ўбачыць гэтую дасканаласць беларускіх народных касцюмаў, вышыўкі, ткацтва. Нашыя невядомыя народныя мадэльеры стварылі стыль, хараство і яскравасць, вартыя быць вядомымі шырокаму колу гледачоў. На выставе таксама можна ўбачыць самі касцюмы з некалькіх гісторыка-этнаграфічных рэгіёнаў Беларусі.

Выстава будзе працаваць па 22 лістапада 2026 г.

Уваходны квіток: 2,50 руб. – школьнікі, студэнты, 5 руб. – астатнія катэгорыі наведвальнікаў. Экскурсійнае абслугоўванне па папярэдняй замове.

Уваход на адкрыццё – вольны.

Тэлефон для даведак: +375 17 363 56 21.

Адрас: г. Мінск, вул. М.Багдановіча, 13.