Імя таленавітага італьянскага аўтара Алясандра Данэзі, які 10 гадоў пражыў на нашых землях у Слоніме і Нясвіжы, абмінута ўвагай. Звесткі аб адмыслоўцу вельмі і вельмі сціплыя, часам памылковыя.

Да таго, як у першай палове 1770-х перабрацца ў Рэч Паспалітую, ураджэнец Рыма Алясандра Данэзі дасягнуў немалых поспехаў на радзіме. Самая ранняя згадка яго як творцы тычыцца калабарацыі з легендарным італьянскім лібрэтыстам і драматургам, оперным рэфарматарам П’етра Метастазіа. Пазней Данэзі паехаў у Львоў. Да красавіка 1775-га аўтар нібыта займаў пасаду прыдворнага капельмайстра ў Лявона Шаптыцкага, будучага ўніяцкага мітрапаліта. Затым была Варшава. А пасля 3 гады, праведзеныя Данэзі ў Слоніме на службе ў вялікага гетмана літоўскага Міхала Казіміра Агінскага. І былі яны надзвычай плённымі. Перш-наперш для рэпутацыі мясцовага аркестра і тэатра. Важны ўнёсак капельмайстра Данэзі ў станаўленне слонімскага тэатра: “Знакаміты аркестр, складзены з вялікай колькасці асоб пад кіраўніцтвам італьянскага дырыжора Алясандра Данэзі, часта даваў выдатныя канцэрты, і папраўдзе добрая польская опера выклікала захапленне ўсёй Літвы”. Міхал Казімір Агінскі з дапамогай італьянскага майстра пісаў оперы.

Чарговая згадка Данэзі датуецца 1782 годам. Сярод асоб, што маюць дачыненне да нясвіжскага тэатра Караля Радзівіла, фігуруе і Аляксандр Данэзі. Гэта “музыкант і спявак”, які “атрымлівае штогод чырвоных злотых 240 і навучае хлопцаў”. Заробак Данэзі, дарэчы, адзін з самых высокіх.