22 мая ў філіяле “Фальварак Ракуцёўшчына” адбылося мерапрыемства “А сэрца ўсё імкне да бацькаўскага краю”, прысвечанае Дню памяці класіка беларускай літаратуры – Максіма Багдановіча.

У гэты цёплы майскі дзень Ракуцёўшчына напоўнілася паэтычным словам, музыкай і асаблівай атмасферай духоўнай еднасці. Менавіта тут, сярод маляўнічых краявідаў, у 1911 годзе знаходзіў натхненне малады паэт, ствараючы творы, што сталі неад’емнай часткай беларускай літаратурнай спадчыны.

Мерапрыемства пачалося з ускладання кветак да памятных камянёў – як знак удзячнай памяці і павагі да генія слова. З уступным словам да гасцей звярнулася Алеся Кузняцова – намеснік дырэктара па навуковай рабоце Дзяржаўнага музея гісторыі беларускай літаратуры, адзначыўшы асаблівае значэнне Ракуцёўшчыны ў лёсе і творчасці Максіма Багдановіча.

Працягам стала літаратурна-музычная імпрэза, падчас якой гучалі вершы паэта, песні і шчырыя словы пра любоў да роднай зямлі. Вядоўцай праграмы стала загадчыца філіяла Любоў Шчэрбач, якая цёпла і шчыра правяла ўсіх прысутных праз старонкі жыцця і паэзіі беларускага класіка.

Асаблівым упрыгожаннем сустрэчы сталі выступленні творчых гасцей – літаратараў, паэтаў і грамадскіх дзеячаў. Сваімі разважаннямі і творчасцю дзяліліся Міхась Казлоўскі, Тамара Аўсяннікава, Тамара Бярэзіна, Ала Клемянок. Іх словы краналі сэрцы, нагадвалі пра важнасць захавання беларускай мовы, культуры і гістарычнай памяці.

Эмацыйным момантам стала выступленне старшакласнікаў Красненскай сярэдняй школы, якія вельмі натхнёна і прачулена чыталі вершы Максіма Багдановіча. У іх галасах адчуваліся шчырасць, захапленне беларускай паэзіяй і жывое разуменне слова паэта. Менавіта такія моманты даюць надзею, што багдановічаўская спадчына будзе жыць у новых пакаленнях.

Музычны настрой свята стварыла выступленне выкладчыцы Красненскай музычнай школы – чароўнае гучанне цымбалаў тонка перапляталася з паэтычным словам.

Гэта сустрэча яшчэ раз засведчыла: спадчына Максіма Багдановіча жыве ў слове, у памяці, у сэрцах людзей. І пакуль гучыць яго паэзія, будзе жыць любоў да бацькаўскага краю.