Майстар-клас Ірыны Князевай “Святло ў шкле: малюем “Відзікі””

Адчуйце магію святла і колеру – запрашаем на творчы занятак па стварэнні “відзікаў” з мастачкай Ірынай Князевай!

“Відзікі” – гэта від народнага дэкаратыўнага роспісу, распаўсюджаны ў Беларусі з канца XIX стагоддзя да 1980-х гадоў, карціны напісаныя фарбай на шкле.

Разам з маляванымі дыванамі, вышытымі ручнікамі і тканымі посцілкамі, “відзікі” фарміравалі цэласны ансамбль пасляваеннага вясковага інтэр’ера. Абразы, рамкі для фотаздымкаў, інтэр’ерныя карціны розных жанраў з выявамі букетаў кветак, птушак, катоў, жанчын, закаханых пар або копіі сюжэтаў вядомых карцін адлюстроўвалі ўяўленні аб прыгажосці і гармоніі жыхароў беларускіх вёсак.

Асаблівасцю “відзікаў” з’яўляецца выкарыстанне фольгі як ніжняга слою – яна прыгожа ззяе праз яркія фарбы і цёмны фон, надаючы карцінам незвычайнае “святло знутры”.

У 2023 годзе “відзікі” былі ўключаны ў спіс нематэрыяльных культурных каштоўнасцей Беларусі. Сёння яны зноў набываюць папулярнасць як аўтэнтычная форма беларускага інсітнага мастацтва. Іх вывучаюць даследчыкі, збіраюць у музейныя і сямейныя калекцыі, праводзяцца этнаграфічныя экпедыцыі і творчыя сустрэчы майстроў.

Падчас майстар-класа:

• удзельнікі пазнаёмяцца з традыцыяй і ўзорамі “відзікаў”;
• пакрокава авалодаюць тэхнікай роспісу па шкле;
• створаць уласны аўтарскі “відзік” пад кіраўніцтвам мастачкі.

Абяцаем: вы снойдзеце натхненне, добры настрой і сапраўднае мастацкае задавальненне!

Час: 23/05/2026, 14:00.

Адрас: аг. Ждановічы, вул. 6-я Дачная, 62 (Філіял “Музей-дача Васіля Быкава”).

Кошт удзелу: 25р. (уваходзяць усе неабходныя матэрыялы: рамка са шклом А4, акрылавыя фарбы, пэндзлі, маркеры, трафарэты, фартухі, нарукаўнікі, сурвэткі і інш.).

Запіс на ўдзел: +375 29 811-21-85.