Аўтарскі курс Кацярыны Масэ “Беларуская традыцыйная выцінанка”

Выцінанка – беларускае традыцыйнае мастацтва фігурнага выразання з паперы і тканіны, якое мае даўнюю і самабытную гісторыю на нашай зямлі. У 2024 годзе беларуская выцінанка была ўключана ў Спіс нематэрыяльнай культурнай спадчыны ЮНЕСКА.

21 лістапада ў Літаратурным музеі распачне працу выстава аўтарскіх работ Кацярыны Масэ.

Запрашаем усіх жадаючых засвоіць чароўнае майстэрства на курсе па выцінанцы. Навучанне будзе спалучаць у сабе і тэорыю, і практыку. Цягам пяці сустрэч мы азнаёмімся з гісторыяй беларускай выцінанкі і яе характэрнымі асаблівасцямі, паглыбімся ў філасофскія і духоўныя аспекты гэтага мастацтва, як і традыцыйнага мастацтва наогул, і, вядома, навучымся вырабляць выцінанкі ўласнаручна.

Спярша мы папрактыкуемся ў выцінанні паводле старажытных узораў і тэхнік, а пасля кожны ўдзельнік зможа стварыць аўтарскую мастацкую працу. Структура курсу цэласная і лагічная, і для таго каб працэс навучання быў як мага больш якасным і прыемным, важна далучацца да кожнага яго этапу.

Усе матэрыялы і інструменты ўдзельнікі атрымліваюць на занятках. Ніжэй вы можаце азнаёміцца з праграмаю курса. Створым разам прастору красы ды натхнення!

Вядоўца курса: Кацярына Масэ – мастачка, паэтка, мовазнаўца з Мінска. Займаецца выцінанкай каля шасці гадоў. Працы Кацярыны – гэта плод сінтэзу старажытных сэнсаў і стылістыкі з сучасным бачаннем і эстэтыкай. Яна стварае як класічныя карціны ў тэхніцы выцінанкі, так і вялікафарматныя выцінаныя палотны.

Колькасць месцаў абмежаваная.

Удзел па папярэднім запісе: +375 17 363 56 21.

Курс набываецца цалкам. Кошт усяго курса (5 сустрэч): 150 рублёў.

Адрас: вул. М. Багдановіча, 13