Наш Васіль Быкаў.

Народны пісьменнік, дзяяч, гуманіст-мысляр.

Па-сапраўднаму народная Асоба ў гісторыі Беларусі.

Васіль Быкаў – усеагульнапрызнаны Чалавек Сусвету, бо вымярае з’явы і падзеі на прамой жыцця чалавецтва ў сістэме адвечных каштоўнасцей. Яго словы зразумелыя кожнаму, незалежна ад месца нараджэння ці месца пражывання. Таму постаць Быкава праз гады і стагоддзі валодае ўнікальнай здольнасцю яднаць самых розных людзей.

Галоўны месяц Васіля Быкава – чэрвень. Так атрымалася, што дзень нараджэння і дата смерці пісьменніка супалі (19 чэрвеня 1924 – 22 чэрвеня 2003) і назаўсёды засталіся з ім. Збалелая душа франтавіка адляцела ў трагічны для Беларусі дзень, які пераламаў лёс і самога Быкава, і стаўся сімвалам ягонай творчасці назаўжды.

З гэтай нагоды, працягваючыю ўжо закладзеную традыцыю, у святочна-ганаровым прадчуванні Дзяржаўны музей гісторыі беларускай літаратуры запрашае гасцей на “Быкаўскія дні”, прысвечаныя 95-годдзю з дня нараджэння Васіля Быкава, якія пройдуць з 19 па 22 чэрвеня 2019 года ў Музеі-дачы Васіля Быкава ў а.г. Ждановічы, што пад Мінскам.

Урачыстае адкрыццё “Быкаўскіх дзён” адбудзецца 19 чэрвеня 2019 года а 14-й.

Падчас мерапрыемства будуць ладзіцца: ганаровая высадка валошак у падарунак Васілю Быкаву, “Быкаўскае чаяванне” з успамінамі аб пісьменніку ад сяброў і блізкіх людзей, урачысты запуск “Пошты Васіля Быкава”.

Акрамя гэтага на працягу чатырох дзён на тэрыторыі Музея-дачы Васіля Быкава запланаваны кінапаказы на адкрытым паветры, эксурсіі па экспазіцыі, падчас якіх загучыць голас гаспадара дачы, ды іншыя цікавосткі.

Кожны наведвальнік Музея-дачы Васіля Быкава зможа выслаць ліст са словамі пісьменніка праз адмысловую “Пошту Васіля Быкава” ў любы куток Беларусі сваім сябрам і сваякам.

22 чэрвеня ў межах “Быкаўскіх дзён” а 11-й гадзіне на Усходніх могілках г. Мінска адбудзецца ўрачыстае ўскладанне кветак і знічоў на магілу Васіля Быкава (збор у 10.50 ля брамы могілак).

Запрашаем ушанаваць памяць аб народным пісьменніку Беларусі Васілю Быкаве з 19 па 22 чэрвеня 2019 года ў Музеі-дачы Васіля Быкава (а.г.Ждановічы, вул. 6-ая Дачная, д. 62), які будзе працаваць з 12.00 да 18.00.

           19 і 22 чэрвеня ўваход у Музей-дачу вольны.

          Кантактны тэлефон: (29) 551-33-35; (017) 334-56-21.

“Быкаўскія дні”

ў Музеі-дачы Васіля Быкава

“Векавечным словам Васіля

Ясніцца крывіцкая зямля…”

Рыгор Барадулін

Васіль Быкаў – Чалавек, якога яшчэ пры жыцці назвалі сумленнем нацыі. Яго імя стала сімвалам беларускай нацыі. Прыцягальныя душэўныя рысы, адметная шматгранным талентам асоба Васіля Быкава і кранальныя творы майстра – усё тое, што прыцягвае да постаці і творчасці пісьменніка.

Геніяў нацыянальнай літаратуры, якім стаў і Васіль Быкаў, трэба найперш чытаць. Яны прамаўляюць да нас не публічнымі выступамі, а сваімі творамі. Іх кнігі вышэйшыя за саму асобу пісьменніка.

Дата 22 чэрвеня 1941 года прайшла праз жыццё і творчасць Васіля Уладзіміравіча. Пісьменніку лёсам было наканавана выжыць пасля двух раненняў і аднаго пахавання, каб сказаць тое, што не сказаў яшчэ ніхто – суровую праўду вайны, за якую Васіль Быкаў змагаўся ўсё жыццё.

19 і 22 чэрвеня Дзяржаўны музей гісторыі беларускай літаратуры гасцінна запрашае ў “Быкаўскія дні” наведаць экспазіцыю Музея-дачы Васіля Быкава ў а.г. Ждановічы.

Ваенныя песні, успаміны пра Васіля Уладзіміравіча самых блізкіх людзей, яго сяброў, што будуць гучаць ў гэтыя памятныя дні, вернуць нас у “быкаўскі час”. Акрамя гэтага госці лецішча атрымаюць магчымасць

• пагартаць альбом з фатаграфіямі Васіля Быкава;
• прайсці па экспазіцыі;
• пачуць голас гаспадара дачы.

У межах “Быкаўскіх дзён” кожны жадаючы атрымае магчымасць прайсці квэст, што дазволіць глыбей зазірнуць у таямніцы творчага і асабістага жыцця народнага пісьменніка.

! У “Быкаўскія дні” ўваход у музей вольны.

Кантактны тэлефон: 8(017) 335-44-47; +375(29)-345-67-52.